نبی اکرم ﷺ کے غصہ اور بردباری کے متعلق جو احادیث وارد ہوئی ہیں ان میں کیسے تطبیق کریں گے ؟ كيف نجمع بين الأحاديث التي ورد غضب النبي صلى الله عليه وسلم وبين حلمه

اما بعد۔۔۔

اللہ کی توفیق سے ہم آپ کے سوال کا جواب یہ دیتے ہیں: 

حلم و بردباری سے کسی کا آراستہ و پیراستہ ہونے سے یہ ہرگز مطلب نہیں کہ وہ بالکل غصہ نہیں کرے گااس میں کوئی شک وشبہ نہیں ہے کہ اللہ کے رسولﷺتمام بنی نوع آدم میں اخلاق کے اعتبار سے سب سے زیادہ کامل تھے اس لئے کہ خودحق تعالیٰ شانہ اس بات کی گواہی دے رہے ہیں کہ :(ترجمہ) ’’بے شک آپ اخلاق کے اعلیٰ درجہ پر ہیں ‘‘ اور ان کے اسی اعلیٰ اخلاق کا ہی کرشمہ تھا کہ آپ ﷺنے کبھی بھی اپنی ذات کے لئے غصہ نہیں کیاجیسا کہ امام بخاریؒ نے (۶۷۸۶)میں او رامام مسلمؒ نے (۲۳۲۸)میں روایت کی ہے کہ :’’آپﷺکو جو بھی اذیت پہنچتی تو کبھی بھی کسی چیز میں اپنی ذات کے لئے انتقام نہیں لیتے لیکن جب اللہ تعالیٰ کے احکامات کی  بے حرمتی ہوتی تو پھر اللہ تعالیٰ کے لئے ضرور انتقام لیتے ‘‘۔ اور امام مسلمؒ کی روایت کردہ حدیث میں ہے کہ :’’آپﷺنے کبھی بھی اپنے دستِ مبارک سے نہ کسی عورت کو مارا اور نہ کسی خادم کو الا یہ کہ جب اللہ کی راہ میں مشرکین سے جہاد کرتے (تو پھر کافروں کو مارتے )اور جب بھی ان کو کوئی اذیت پہنچتی تو کبھی بھی اپنی ذات کے لئے انتقام نہیں لیتے لیکن جب اللہ تعالیٰ کے احکامات کی بے حرمتی ہوتی تو پھر اللہ تعالیٰ کے لئے ضرور انتقام لیتے ‘‘۔لہٰذا آپﷺسے غصہ والی جو روایات آئی ہیں ان کو غضبِ ممدوح پر محمول کیا جاسکتا ہے اس لئے کہ وہ اللہ تعالیٰ کی خوشنودی کی خاطر تھا اور آپﷺکا غصہ بھی آپ ﷺکو اللہ کی شریعت سے نہیں نکالتاتھا بلکہ آپﷺکی ناراضگی اور رضامندی دونوں حالتیں حق پر مبنی ہوتی تھیں اور اس پر امام ترمذیؒکی روایت کردہ حدیث (۱۹۹۰)بھی دال ہے جو حضرت ابوہریرہؓ سے مروی ہے کہ صحابہ نے عرض کی کہ اے اللہ کے رسول! آپ ہمارے ساتھ ہنسی مذاح بھی کرتے ہیں تو آپ علیہ السلام نے ارشاد فرمایا:میں حق کے سوا کچھ نہیں کہتا‘‘۔